كتير من الشباب المؤيدين ابو الفتوح تقريباً 90% هنا على تويتر كانوا هيرفضوه لو متفصلش من الجماعة, لمجرد تابعيته للاخوان لكن طالما اتفصل م الجماعة خلاص ممكن نأيده ونوافق عليه وننتخبه ونرشحه انا مش ضده شخصياً ف حاجة او ف اي حد يأيده, كل انسان ليه رأيه وهو حر فيه
لكن الشباب بقى عندهم سكيتزوفرينيا بشكل غريب رفض مطلق للاخوان وخلاص -انا معارض الاخوان في معظم مبادئهم- هو فكره مش هيتغير ولا مبادئه
وبرنامجه واسلوبه وسياساته فالكام شهر اللي انفصل فيهم عن جماعة الاخوان المسلمين انتوا ليه منافقين نفسكم! ويقولوا ابوالفتوح غير الاخوان ف ايه طيب ؟ واحد من يوم ما قال يا سياسة وهو اخوان!
انا مختلف مع الاخوان ف حاجات كتير اوي وعلشان كدة مختلف مع ابو الفتوح برضه لنفس الاسباب
انا قريت ف برنامج ابوالفتوح وفي حاجات كويسة, لكن سياسياً كمبادئ سياسة انا مختلف معاه
بس علشان انا اتخنقت من كتر الناس اللي بتقول ابو الفتوح غير الاخوان هو منهم ولومتفصلش كان اترفض وكان سااعتها لو سألت حد انت ليه مش عاوز تسمع برنامج ابوالفتوح او رافضه ليه هتلاقي جواب تلقائي .. ده اخوان! وانا بقول انا رافض ابوالفتوح لإنه اخوان, حتى لو مش ف الجماعة او الحزب هو ده تفكيره وهو ده انتمائه وهي دي سياسته
انا تقريباً مش هنتخب حد لإن مفيش حد اترشح كفء للانتخابات دي
لكن ده شرح موضوع ابوالفتوح من وجهة نظري
واحدة من اهم عيوب النظام التعليمي في مصر هو الناس
ايوة الناس .. انا وانت وانتي واغلب ان لم يكن كل المصريين
منتشر عندنا ف مصر من زمان اوي فكرة الشهادة ..! تلاقي الام بتقول لصاحبتها او جارتها لازم ابني ياخد شهادة
وتلاقيها بتقول للابن او للبنت لازم تتعلم وتاخد شهادة عالية علشان نفرح بيك
ونعرف نجوزك
فبقت الشهادة الجامعية في حد ذاتها هدف, بقى مش مهم اي شيء غيرها
لما يبقى كل سنة في 300 او 400 الف داخلين كليات ومعاهد
هيعملوا ايه !؟ ولما يبقى كل دول دكاترة وصيادلة ومهندسين ومحاسبين ومتجرمين وفندقيين
ومدرسين
مين اللي هيبقى نجار ومين هيبقى سباك ومين هيبقى خياط ومين هيبقى بياع
ف بيكون في نسبة بطالة كبيرة وناس كتير مش لاقية شغل
هما اللي بيشتغلوا المهن دي
ويبقى خريج كلية كويسة وشغال بياع او سواق ميكروباص
طب ليه؟
ويبقى حاسس بالقهر والذل لإنه ضاع من عمره سنين ف تعليم مش مفيد ولم يعطيه اي شيء ف حياته غير الشهادة
التعليم لازم يتحول لنظام تنمية مهارات مش كلام على ورق
التعليم الفني اهم من التعليم الاكاديمي , لإن التعليم الفني هو ده اللي بيخرج كل ما يحتاجه الناس من مهن اجتماعية بتكون في حياتنا كل يوم
بيكونوا متخصصين ومتعلمين
الدراسات الاكاديمية بتكون موجودة مش مجانية ومش لكل الناس
مينفعش كل سنة يطلع 100 الف مهندس و 15 الف دكتور و12 الف صيدلي و200 الف محاسب
ارقام مهولة وبنسأل ليه التعليم بايظ !؟ وليه مفيش شغل ؟
لإن مفيش مجال هيوفر فرص عمل لكم الناس اللي بتتخرج من الكليات عندنا
دي حقيقة لازم نعترف بيها
المظاهر الكدابة كانت احد عيوب النظام التعليمي اللي جابنا ورا
بقينا على بوادر ازمة بنزين جديدة وإذا كنا حقيقي ملحقناش ننتهي من القديمة
واذا كانت مصر بلدنا وناسها وشعبها لسة مش راضيين بتمكن العسكر من السلطة
واذا كان لسة في ناس بتقول يسقط حكم العسكر-سواء بيزيدوا او بيقلوا- هنفضل نشوف ازمات
من ازمة بنزين لأزمة بوتجاز لأزمة نقصان انواع ادوية بالمئات لغلو اسعار ف الكهربا والمياة
مش هتخلص الأزمات وكل ما هتخلص ازمة هيطلع غيرها
وكل ما هيوهموا الناس ان الازمة الموجودة اتحلت هيطلع غيرها
بكل بساطة العسكر بيحاولوا يفرجوا الناس على المشاكل اللي هتحصل في حالة غيابهم عن السلطة
العسكر بيزودوا الازمات علشان يخوفوا الناس, العسكر بيرهبوا الناس بالمشاكل
بيخوفوهم بالنقص والحرمان, بيتعبوهم ويقرفوهم علشان الناس تكره الثورة
علشان الناس تقول كنّا مرتاحين من غيرها
عاوزين الناس تندم على انهم عملوا ثورة
عاوزين الناس تقبل بوجودهم عاوزين الناس تسمع للعسكر وتحبهم
زيها زي اي ازمة البنزين اللي فاتت اتحلت بدون مشاكل بس بعد ما تعرف الناس قيمة بقاء العسكر
بيحاولوا يوهموا الناس ان بقائهم ف السلطة نعمة لمصر
! واللي بيخاف من الموت انسان ميت بالفعل
الموت ساعة ... الخوف هو موت كل ساعة
يسقط يسقط حكم العسكر
واهم حاجة ان مصر لن تركع !! هع هع قال لك لن تركع
فعلاً المصريين لن يركعوا وسيرحل العسكر وستسقط دولتهم
